Vernon Walters, bniedem militari
Amerikan, fil-karriera twila tiegħu intbagħat minn diversi Presidenti
ta’ l-Istati Uniti ta’ l-Amerika, ta’ partiti
differenti, għal missjonijiet diffiċli fejn ma
setgħux jidhru huma’; bħal xi missjoni sigrieta
biex jiġu meħlusa ostaġġi Amerikani;
jew inkella sabiex ikun jaf l-opinjonijiet ta’ mexxejja
alleati; jew inkella sabiex iwassal xi messaġġ lil
xi pajjiż li r-relazzjonijiet tiegħu ma’ l-Amerika
ma kenux tajbin.
Walters, li kien kattoliku prattikanti,
dejjem qeda dmiru b’lealta’ kbira’ għalkemm kellu fehmiet
politiċi tiegħu, dejjem serva lill-President, u
mar fejn bagħtuh.
Darba minnhom f’waħda minn dawn il-missjonjiet,
spiċċa fil-ġungla li ma tispiċċa
qatt ta’ l-Amazon fil-Brażil; fl-Amazon kemm diversi
tribujiet, uħud minnhom kważi maqtugħin għal
kollox mid-dinja moderna; terġa’ ħafna minn
dawn it-tribujiet, għandhom id-djalett jew lingwa tagħhom.
F’wieħed minn dawn it-tribujiet sab missjunarju
lajk amerikan. Dan il-missjunarju kien jagħmel parti
minn grupp reliġjuż li xogħlu kien li jittraduċi
il-Bibbja fl-lingwi kollha mitkellma fid-dinja. Kien qiegħed
hemm sabiex jittraduċi il-Bibbja fil-lingwa ta’ dan
it-tribu’, mitluf fil-qalba tal-ġemgħa; meta
Walters saqsieh kemm jaħseb li kien se jdum f’dil-missjoni
tiegħu, il-missjunarju wieġbu: “ma nafx:
jekk hemm bżonn forsi ħajti kollha”.
Id-dedikazzjoni u vokazzjoni
ta’ ħafna nies li
jagħmlu l-ġid u jgħixu għal ħaddieħor “bil-moħbi”,
qatt ma jidhru fil-paġni tal-gazzetti, għaliex
l-aħbarijiet sensazzjonali iservu aħjar il-kurżita
tal-qarrejja li l-gazzetti jħobbu jgħarrxu. Pero’ huma
dawn in-nies ta’ wara l-kwinti li jagħmlu l-Knisja
sinjura, u dawn huma il-veri teżori tagħha.
Kull darba li niltaqa’ ma’ xi membru ta’ komunita’ li
jagħmlu xogħol “għal ħaddieħor”,
nara fihom – għall-inqas dawk li huma ġenwini – ċerta
trankwilita’ li hija riflessa fl-attitudinijiet tagħhom,
f’ħarsithom u fuq kollox f’għajnejhom.
Jitkellmu b’ċerta ħeġġa li ħierġa
minn qawwa interna li ma tidhirx. L-aktar li nara dil-ħaġa
hi fis-sorijiet tal-klawsura; hawn min għandu ideja żbaljata
tal-ħajja f’klawsura; u hawn minn jippontifika
u jgħid li dawn huma membri “moħlija” li
jistgħu jintużaw għal skopijiet iktar prattiċi.
Xejn ma hu ibgħed mill-verita’. Dawn il-komunitajiet
, kull darba li ltqajt magħhom, ninnota li jxerrdu u
jirradjaw ċertu ferħ intern u estern li diffiċli
li tiddeskrivih. Bħalma hu diffiċli li tiddeskrivi
l-ferħ u paċi ġewwinija li tħoss meta
tagħmel azzjoni tajba lil ħaddieħor. Kemm
il-darba aħna nfittxu l-ferħ f’oġġetti,
miżuri u ħwejjeġ li temporanjament iserrħu
l-menti jew il-ġisem; iżda ma hawn xejn li jirbaħ it-trankwilita’ li
wieħed iħoss meta jgħin lil ħaddieħor.
Niftakar wieħed tabib jirrakontali storja ta’ wieħed
oftamalogu, li meta ġiet waħda mara biex jaralha
għajnejja, tant kienet sfigurata u mkemxa, li kienet
l-eqreb li wieħed jista’ jimmaġina għal
saħħara.
Madankollu meta raha qallha “Sabiħa tiegħi,
ejja ħa narak”; probabbli ħadd ma kien qatt
sejħilha “sabiħa”; iżda dik l-azzjoni
tajba probabbli ferħet qalb ta’ bniedma li ħasbet
li hemm min jirrispettaha għal li hi u mhux kif suppost
tkun.
Kemm hu diffiċli ħafna drabi li n-nies naċċettawhom
kif inhuma: ħafna drabi irriduhom bħalna, qisu
hawn xi ħadd eżatt bħal ħaddieħor;
mentri irridu dejjem naċċettaw lil ħaddieħor
bil-karatteristiċi tiegħu. Kemm ġlied jinqala’ proprju
għaliex irridu lil uliedna jew il-konjugi tagħna
mera tagħna nfusna; jekk inti għandek kariga, professjoni
jew sengħa, irriduhom ikunu bħalna flok inħalluhom
jiżviluppaw il-personalita’ tagħhom.
Il-Mulej aċċetta lil kull min iltaqa’ miegħu
kif inhu; lil Mattew li kien jiġbor it-taxxi, u kien
jeffrekwenta postijiet li għandhom jiġu evitati,
mar ifittxu hu u sejjaħlu għal warrajh; xena immortalizzata
fil-pittura tal-Caravaggio f’San Luigi dei Francesi
f’Ruma. Ma kellux preġudizzji dwar sinjuri u fqar;
kien jaċċetta lil kulħadd bħala dixxiplu:
lil Maddalena bil-passat oskur tagħha, lil Ġużeppi
ta’ Aramatea, Fariżew u sinjur minn butu, lill-imġidma,
id-dgħajfa, iz-zopop u l-għomja. Ħadd eskluż – basta
kellhom rieda tajba.
Il-ħitan tas-sejjieħ jew tal-konkoss li aħna
l-bnedmin irnexxilna nibnu b’mod tant artifiċjali
jistgħu jitħattew bir-rieda tagħna lkoll,
izda qabel irridu nbiddlu l-ebusija ta’ qlubna, nwarrbu
il-preġudizzji, u ma nbarrux lil min, għal xi raġuni
jew oħra hu differenti minna. “Meta? Jekk hemm
bzonn, ħajjitna kollha”!
1 - 10 - 2003
TONIO BORG
